美部會話劇 : 乾草堆禱告會 (第二幕)

（字幕打出〔或加插一幕以默劇形式表達〕：一八零八年九月，Samuel John Mills、James Richards和另外數位有心志往海外宣教的同學，當中包括Gordon Hall、Luther Rice，在校園裡秘密地組織了北美洲第一個差傳組織：The Brethren，旨在實現把成員差往未信之民這目標。為免他們那看似稚嫩的構想在萌芽階段便遭各方壓力所扼殺，他們一直保持組織的隱秘，成員均需具備海外宣教的心志，經多番面談，再以密語宣讀約章並簽名作實方可加入。）
（字幕打出：一八一零年，美國麻省安多佛神學院）
（燈光復亮，Samuel John Mills、James Richards、Luther Rice、Adoniram Judson跟Gordon Hall把臂相迎）
Gordon Hall：我喺康涅狄格服務嘅教區想我留下做佢地嘅牧師，我好想喺做決定之前搵你哋商量一下。
James Richards：（望向Samuel John Mills）Samuel，你點睇？
Samuel John Mills：Gordon，你係諗緊一旦應承咗做佢哋嘅牧師，我哋出去宣教嘅夢就會……
Gordon Hall：係，我一路喺度諗，又向主祈禱，究竟佢帶我走一條咩嘅路？我重記得我哋組成時嘅誓章，重記得過去呢幾年我哋一齊做過嘅功夫、一齊祈嘅禱，我自問重有宣教嘅熱誠，但係我哋重要等幾耐呢？好似而家有教會想我留下牧會，我應該點樣回應呢？
Luther Rice：我哋呢兩年喺屋企裡面，喺弟兄姊妹間引起咗好多關於海外宣教嘅討論，而我哋亦已經同一班教會領袖同牧者分享過我哋嘅諗法，似乎我哋係時候諗諗走前多一步。
James Richards：始終我哋都需要有教會嘅支持，先能夠實現宣教嘅目標。
Andoniram Judson：其實恕我呢個新加入者多言，與其等我哋國家成立自己嘅差會，我哋何不考慮一下尋求譬如倫敦傳道會呢ｄ外國嘅差會支持呢？
Samuel John Mills：可能我哋中間唔止你一個有咁嘅諗法，但我以為如果我國教會能成立屬於自己嘅差會，佢嘅意義遠不止支持個別幾個宣教士出外傳教咁簡單，佢會係一場關係到美國所有教會嘅屬靈運動，所以我認為唔使等多幾耐，我哋就能夠有屬於我國嘅差會，我相信上帝係聽禱告嘅上帝。
Adoniram Judson：你哋有冇諗過搵新上任嘅Professor Stuart傾下，我覺得佢會認同我哋嘅諗法。
Gordon Hall：Professor Stuart？
James Richards：Professor Moses Stuart，新來教sacred literature嘅。
Gordon Hall：佢係Centre Church of New Haven嘅牧師來㗎噃。
Luther Rice：（望向Samuel John Mills）Samuel，你點睇？
Samuel John Mills：正如你所講，我哋都係時候走前多一步，不如我哋就為呢樣嘢交托，祈完禱，就一齊去見一見Professor Stuart，可能佢會幫到我哋。
James Richards：好，我記得當日你講過，只要我哋都願意，我哋一定能做成呢件事！
（眾人應和，一起跪下禱告，燈光轉暗，各人退出）
（字幕打出〔或加插一幕以默劇形式表達〕：Moses Stuart安排了學生們在其家中與一些地區牧長會面，並得到正面的回應，學生們的請求被排在當週General Association of Massachusetts會議的議程上。Adoniram Judson起草了一紙有關請求支援他們到海外宣教的文章，各人在其上加簽，呈到大會。一八一零年六月底，大會接納學生們的請求，通過成立美國史上第一個基督教海外傳教機構──美國公理宗海外傳道部，即今簡稱美部會。在美部會成立最初之五十年間，被差的宣教士數目已超越一千二百人。在往後一世紀，美國的宣教運動和學生志願運動亦迅速壯大，差會一個接一個紛紛成立，神學院和大學裏的學生大批加入為宣教禱告的運動，這個國家差出了許多的宣教士往世界各地……）