美部會話劇 : 間幕

（燈光復亮，舞台中央，雨聲響著，母子正打著傘在街中候車。）
兒子：啊，亞媽，你講個咁嘅故事我聽，又叫我返祈禱會，唔通你想你個仔我有朝一日成為宣教士？
母親：你成唔成為宣教士，唔係我話想就做到，祈禱並唔係要上帝成就我哋嘅心意，而係容讓上帝嘅心意喺我哋身上成就，就好似故事裡面嘅Samuel Mills，佢媽媽喺佢好細個嘅時候就已經祈禱將佢奉獻畀主作宣教士，但係直到Mills十七歲時，佢先真正明白同接受救恩，而雖然Mills自此就好想到海外宣教，一直為此祈禱，但係佢最後都冇做到……
兒子：（插口）Samuel Mills冇做到宣教士？
母親：冇，佢卻係喺美國本土做咗好多動員嘅工作，鼓舞咗左多人加入宣教行列。
兒子：嗯，你就都好似佢媽媽咁，都好想我做宣教士，一定係，唔係你都唔會改個英文名做Samuel。哈，ｄ叫Samuel嘅亞媽都有ｄ共通點，舊約個哈拿係咁，Mills個亞媽又係咁……
母親：做亞媽嘅，你估佢會好捨得畀個仔去宣教咩，但係如果上帝叫你生性，又咁長進，我唯有祈禱求上帝改變我安慰我。
兒子：……（四圍張望）
母親：做咩唔講野？
兒子：我哋好似係截緊車個可？
母親：乜真係咁耐都冇架的士㗎？
兒子：我而家真係有ｄ衝動祈禱……
母親：祈禱唔係一時衝動，係要恆切操練㗎。就好似我哋禮拜堂……
兒子：（插口）我係祈禱希望快ｄ截到車，唔使再喺度揼雨。……你頭先話咩我哋禮拜堂話？
母親：我係話我哋禮拜堂由美部會差喜嘉理牧師來香港建立都係一班旅美華人多年恆切禱告嘅結果……
（燈光轉暗，二人退出）