美部會話劇 : HONG KONG MISSION (第一幕)

（字幕打出：一八七六年某一個星期三的晚上，美國加州三藩市綱紀慎會堂內）
（燈光復亮，舞台中央，Pond、朱金和數名會友圍在一張桌子旁查考聖經。）
Pond：我哋從呢段經文可以睇到保羅佢對向外邦人宣教嘅事工有好大嘅負擔，聖經裡面用咗好多篇幅記述保羅三次嘅傳道旅程，佢點樣蒙異象，將福音帶到馬其頓以至歐洲，我哋知道後來嘅千多年來，歐洲大陸點樣受基督教文化所影響，直到今日。
朱金：牧師，保羅豈不是係海外宣教嘅先驅？
Pond：都可以咁講。但係佢每去到一個地方，佢多數都會先去拜訪當地嘅猶太同胞。所以佢雖然身在異邦，其實仍好掛念自己同胞係咪聽信耶穌基督嘅救恩。朱金：我哋都係。（其餘眾人均點頭稱是）
Pond：你嘅意思係？
朱金：我嘅意思係我哋都好似保羅咁身在異邦，心繫家鄉嘅同胞能唔能夠聽信福音，其實喺過去呢三年，我哋一直都祈禱，希望有朝一日，有人可以好似保羅咁，奉差去到我哋嘅家鄉同我哋ｄ鄉里傳講福音。我哋更加希望有朝一日，耶穌嘅福音能夠傳遍整個中國……只不過我哋唔知應該同邊個講好。（眾人附和）
Pond：你哋有咁嘅諗法，相當好，亦係正常不過嘅事。當一個人蒙主救恩光照後，都會好想其他人都同佢一樣，分享到主耶穌平安嘅福音。我相信你我都一樣，當我哋望向呢個有如福音禾場嘅世界，都好想好似主耶穌喺福音書所講，求莊稼的主打發工人去收莊稼，因為要收嘅莊稼多，作工嘅人少。而你哋諗到遠在家鄉嘅骨肉至親、同胞朋友，諗到佢哋並冇機會接觸到基督教信仰，冇永生嘅盼望，你哋為佢哋焦急，發熱心，係好應該多多為佢哋禱告嘅。
朱金：咁，龐牧師，我哋除咗禱告，重可以做ｄ咩？（眾人目光望向Pond）
Pond：嗯……據我知，有唔少歐美嘅宣教士喺中國宣教，但以你哋華南一帶為基地嘅就好似唔多……你哋可以嘗試寫信去我哋總會（American Missionary Association，美國傳教士協會），邊個能夠寫英文嘅都寫，講解一下你哋嘅構想，點解咁想差宣教士到你哋嘅老家傳福音，我會幫你哋轉交上去，睇下總會有乜嘢意見。亦可以加入一ｄ具體嘅建議，例如你哋覺得選邊一個地方作為宣教基地會較好……
朱金：牧師，我哋大部份人都來自廣東，來美國嘅時候，都係先到香港再坐大船過來，亦有好多我哋嘅鄉里由美國呢邊返去鄉下都要取道香港，唔知香港會唔會係一個好嘅選擇？
Pond：嗯……香港係中國嘅南大門，而家又係英國嘅殖民地，香港人接觸英文同洋人都畀較多，對於宣教士來講，會容易ｄ溝通。香港作為一塊踏腳石不失為一個好嘅選擇。
朱金：嗯，如果宣教士能夠喺香港開設英文班，好似你哋喺美國呢度教我哋英文咁，一定能夠吸引到更多人到教會認識福音。我哋今晚就返去寫信……（眾人應好，燈光轉暗，Pond和朱金退出）