美部會話劇 : 乾草堆禱告會 (第一幕)

（字幕打出：一八零六年八月某個炎熱的週六正午，美國麻省威廉斯敦威廉斯學院校園裡）
（燈光復亮，Samuel John Mills、Harvey Loomis和Andrew、同學乙從台左右分別步出）
Samuel John Mills：（走近Andrew）一陣間老地方祈禱，記住來。
Andrew：今日天氣太熱喇，唔好預我喇，下星期先啦…（說著跟另一同學乙搭著肩離開）
Peter：（出台，走近米爾斯和魯米斯）Samuel、Harvey，唔好意思，我今日唔係咁舒服，來唔到，可能係太熱啦，我想返去抖吓，請你哋祈禱時為我代禱好嗎？
Samuel John Mills：冇問題，你好好休息啦！
（Samuel John Mills和Peter各向台左右退出）
（James Richards、Francis Robins、Samuel John Mills、Harvey Loomis和Byram Green陸續由舞台各方步出，出場時彼此問好，此時投射屏幕上顯示一個乾草堆作背景）
James Richards：我啱啱睇完威廉克理本書，實在精彩！哈，加埋課堂上讀到有關亞洲同東印度公司嘅課題，我諗我開始明白Samuel你嘅諗法。
Samuel John Mills：呢個世界上實在有太多未信者，就好似威廉克理佢去嘅印度，好多人都仍然活喺黑暗裡面，佢哋敬拜好多鬼神，但卻係唔認識上帝先至係獨一嘅真神，主耶穌係唯一嘅拯救，我哋基督徒實在有使命要為上帝打贏呢場屬靈嘅戰爭；亞洲、其實重有非洲，係一個廣大的禾場，等住主差僕人去收割莊稼，就好似威廉克理今日做緊嘅工作，實在太有意義喇！
Harvey Loomis：嗯……其實喺美國，我哋一樣有好多人需要福音，我認為應先專注做好本土嘅佈道工作至去諗往外地宣教。我始終認為亞洲人同非洲人佢哋同我哋喺文化上有好大落差，唔怕得罪講句，佢哋有ｄ直頭係未開化嘅野蠻人，如果貿貿然去宣教，實在好危險。正如Samuel你所講，呢場係一場爭戰，我哋應先派兵攻佔呢ｄ地域，再用我哋嘅基督教文化教化佢哋，到時佢哋自然就會接受基督教信仰。
（Francis Robins、Byram Green點著頭把目光移向米爾斯）
Samuel John Mills：你咁嘅諗法同十字軍東征有咩分別？使徒保羅當日將福音帶去歐洲都遇過好多危險，但佢最大嘅攔阻係來自佢嘅自己人，即係猶太人。（James Richards點頭稱是，跟著是一片沉默）
Byram Green：（打圓場，轉話題）我哋講下講下，都未見其他人來嘅？
Francis Robins：又係喎。
Harvey Loomis：頭先我哋撞到Peter，佢有ｄ唔舒服，想返去休息一下，叫我哋為佢代禱，Andrew佢話熱得滯，唔來嘞喎……
Francis Robins：今日又真係幾熱…我諗今日都只係得我哋五個…
Samuel John Mills：五個就五個囉，只要有兩三個人奉主的名聚會，主就喺我哋中間。我好想為到我哋自己嘅心志祈禱，正如Harvey所講，去外哋宣教，困難重重，但係在主冇難成嘅事，喺威廉克理身上，我哋已經見到主嘅預備、揀選同埋大能，又見到主實在好想見到更多未信者得聞福音，我認為我哋可以一齊祈禱，先求神在我哋心中動工，叫我哋成為佢合用的器皿，委身向未信者宣教嘅事工，又畀我哋國家都有自己嘅差會，差宣教士到國外去，將福音遍傳。
James Richards：我贊成。來啦！我哋不如開始祈禱囉！
（他們正開始禱告之際，突然天響起大雷）
Byram Green：你哋睇下嗰邊，ｄ雨飄緊埋來，重好似好大雨喎！（雷雨聲大作）
Harvey Loomis：（指著投射屏幕上的乾草堆）嗰邊有堆乾草，捐入去避下先啦！
（五人蓋著頭，急步奔向投射屏幕，並從幕下鑽進去）
（雷雨聲愈來愈響）
（字幕打出：就這樣，五位少年人躲在乾草堆底下，一邊等待雷雨過去，一邊跪下大聲的禱告上帝，直至雨過天青，Samuel John Mills領他們唱了一首詩歌來結束禱告）
Samuel John Mills：只要我哋都願意，我哋一定能做成呢件事！
（各人應和，燈光轉暗，各人退出）