美部會話劇 : 序幕

序幕
（舞台中央飯桌上，母子在同檯吃飯。）
兒子：（匆匆吃完，便抱起桌下皮球，向母親敷衍交待了一聲，便直奔出大門。）約左阿咸踢波，我出去喇……
（母親還未及回應，天已打起雷，響起滂沱大雨聲。）
兒子：（失落地折返家門）打波先來落雨！
母親：踢唔成波，可以跟我返祈禱會啦！
兒子：唔係嘛！祈禱會？……（手機響起，接聽）等陣……喂，阿咸……係啊，我呢邊都落到倒水咁……咁有冇其他野搞呀？我阿媽叫我陪佢返祈禱會啊……唔係嘛……喂，喂……唓～～咁就收線㗎……（收起手機）
母親：（邊執拾飯桌邊說）點啊？落咁大雨，阿咸約你去邊啊？
兒子：去鬼去馬咩，佢話留響屋企睇電視喎。
母親：咁你跟唔跟我返祈禱會吖？
兒子：……我打機（步向房間）……
母親：（放低手裡的碗筷）你唔出街嘅話，咁不如你打遲陣機，同我洗埋ｄ碗先嘞，等我早ｄ出門口，費事大雨塞車。
兒子：……（轉身回到飯廳）咁，如果我陪你返祈禱會，係咪唔使洗碗先？
母親：唔係陪，係同我一齊返，你唔好諗住帶部機去打呀。
兒子：……咁悶……
母親：咁你大可選擇留響屋企……洗碗。
兒子：……唉，我去喇我去喇，但其實我真係好唔明，你哋班auntie、uncle個個禮拜都去祈禱會，祈來祈去都唔見個世界變得好ｄ和平ｄ，不如action重實際啦。
母親：咁我夠唔明，你哋幾個後生仔，個個禮拜出來踢波，踢來踢去都唔見你哋會踢到去世界盃，咁你哋又繼續踢？
兒子：踢波又點同祈禱？
母親：咁又真係唔同，我去祈禱會，風雨不改，但你哋落大雨就唔踢得；我哋人多人少都照祈，你哋如果得番一兩個就踢唔成，重有我相信，任你哋點踢都永遠踢唔到去世界盃，但如果你肯祈禱，話唔定世界會因此而改變。
兒子：有冇咁誇呀？
母親：唔算誇，係歷史來㗎……
（燈光轉暗，兩人退出）